Үндэр уралигтай танилсуулһан агуу бэлигтэн

Дэлхэйн хоёрдохи дайнай үедэ Флоренциин университедтэ уран зураг ба архитектура шудалжа байһан оюутан Франко Дзеффирелли итальян Эсэргүүсэлгын зэргэдэ жагсажа, фашизмтай тэмсээ һэн. Дайнай һүүлээр Лоуренс Оливьегэй найруулһан «IV Генрих хаан» гэжэ фильм хараад, театрта, кинодо бүхы наһаяа зорюулха гэжэ шиидээ бэлэй. Суута режиссер Лукино Висконтиин туһалагша болоод, тайзаниие шэмэглэгшын ажалһаа зохёохы намтараа эхилһэн юм. Энэ режиссертой хамта «Трамвай „Желание“, „Три сестры“ гэжэ зүжэгүүдые тайзан дээрэ бүтээһэн байна. Саашадаа итальян неореализмын агууехэ режиссернууд Витторио де Сика, Роберто Росселини гэгшэдтэй хамта хүдэлжэ, уран бэлигээ мүлин хүгжөөгөө.


Бүхыдөө 18 кино буулгаа, хори гаран зүжэг болон оперо найруулаа. Дэлхэйн олон сая кино харагшад тэрэнэй аша туһаар дээжэ классическа зүжэгүүдтэй танилсаһан байха. Шекспирэй „Гамлет“ буулгаа, „Ромео ба Джульеттэ“ зүжэгтэ Нино Рота композиторай хүгжэм, бэлигтэй зүжэгшэдэй уян һайхан наадан энэ фильмые суурхуулаа. Режиссурын түлөө „Оскар“ болон „Алтан глобус“ шангууд, мүн эрхим костюмай, эрхим операторай ажалай түлөө „Оскар“, 5 дахин „Давид ди Донателло“, „Эмми“ шангууд барюулагдаа һэн. „Советский экран“ хэблэлэй сэгнэлтээр, 1972 ондо энэ кино эгээн эрхим хари гүрэнэй фильм гэжэ нэрлэгдэһэн байна.

1974 ондо Барселонодо юрэ бусын мүрысөөнэй үедэ „Лисео“ театрта „Кармен“ оперын дүрбэн ондоо найруулга харуулагдаа бэлэй. Франко Дзеффиреллиин найруулһан оперодо Карменэй ролиие СССР-эй арадай артистка Елена Образцова наадаа һэн. Энэл найруулга эрхим гэжэ сэгнэгдэһэн юм. „Кармен“ хадаа минии дууладаггүй, харин намаар дуулуулдаг ори ганса оперо» гэжэ дуушан өөрөө хэлэһэн байдаг.

Ород агууехэ дуушаниие тэрэ дахин 1982 ондо Масканьиин «Сельская честь» оперодо Сантуцциин роль наадахыень уриһан байна. Энэ хамтын ажал тухай агуу режиссер иигэжэ хэлэһэн юм: «Минии наһанда гурбан ехэ сэдьхэлэй доһолоон болоһон — Анна Маньяни, Мария Каллас, Елена Образцова. „Сельская честь“ фильм буулгаха үедэ тэрэ ёһотой гайхамаар юумэ бэелүүлээ бшуу».



1982 ондо «Травиата» оперо кинодо буулгахадаа, гол рольнуудта алдар солото дуушад Тереза Стратас (Канада), Пласидо Доминго (Испани) гэгшэдые уряа һэн. Бал-маскарадта хатарагшадай рольнуудта Ехэ театрай ододые, Екатерина Максимова Владимир Васильев хоёрые урижа буулгаа һэн.

2004 ондо Хоёрдугаар Елизавета хатан суута режиссерто Британ империин рыцарь-командорой хэргэм олгуулһан байна.

Агуу дуушан Мария Калласта зорюулагдаһан уран һайханай фильм тэрэнэй һүүлшын ажал болоо һэн. Суута француз зүжэгшэн Фанни Ардан энэ роль гүйсэдхэһэн юм.

Театрай болон оперын дээжэ бүтээлнүүдые олон сая зоной анхаралда табижа, үндэр уралигтай танилсуулһан агуу уран бэлигтэнэй нэрэ соло түүхэдэ мүнхэ үлэхэнь дамжаггүй.