Залуушуулай һүниин нааданууд

15-16-һаа эхилээд, 26-27 хүрэтэр наһатайшуул нэгэнэйдээ сугларжа, һүниин наада хэдэг һэн. Гушаад наһатай болоһон хүн наһатай тээшээ тоологдожо, нааданда ябадаггүй бэлэй. Мүн гэр бүлэ болоһон залуушуул һүниин нааданда хабаадалсахаяа болидог һэн. Бэеэр томо 13-14 наһатай үхибүүд һүниин нааданда хамаагүй байлсадаг бэлэй. 

Тээ харанхы болоод байхада, ганса нэгээрээ, хоёр хоёроороо Ага нютагай уужам дайдаар ардаг мориёо хатаруулжа, амараг нүхэрөө, хазаар мориёо магтаһан дуу дуулалдаһаар, нааданай болохо газар тээшэ һубарилдадаг һэн. Айлай эзэн эхэнэр заабол сай ехээр шанажархёод, хэдэн табаг сагаан эдеэ түхеэржэрхёод, һүниин нааданда ерэхэ зониие хүлеэдэг байгаа. Ерэһэн лэ хүндэ, үхибүүдшье һаань, сай аягалагша һэн. Тиигэһээр наадан эхилдэг бэлэй. 

Бэһэлиг нюулган, нэрьелгэ, тэргэ гү, али түүдэг тойролго гэхэ мэтэ һүниин наадан байһан юм.