Дылыков Виктор

Хадата Түнхэнэй аймагай Харбяангууд нютагта 1954 оной октябриин 16-да Виктор Цыденович Дылыков үнэр hайхан, олон үхибүүдтэй гэр бүлэдэ түрэhэн юм. Балшар багаhаа хатар нааданда дуратай байгаа. Аба эжынь хүбүүнэйнгээ хатарта дуратай байhыень мэдээд, Хэрэнэй интернат — hургуули дүүргэхэдэнь, Улаан-Yдын соёл гэгээрэлэй училищи hурахыень эльгээгээ. Тус соёлой гуламта амжалтатай түгэсэжэ, Виктор Дылыков шэлэн абалгын шата эрхимээр дабажа, гүрэнэй дуу хатарай «Байгал» ансамбльда ороhон байна.

Сэрэгэй алба гарахадаа, РСФСР-эй габьяата артист Аюша Данзановай зууршалгаар Монголой Улаан — Баатар хотодо совет гарнизоной 58-дахи тоглолтын ансамбльда хатараа. Удаань турэл ансамбльда бусаа бэлэй.

— «Байгал» ансамбльтай Советскэ Союзой бухы шахуу хотонуудаар, хари гүрэнуудээр гастрольда ябаабди. Элдэб гоё hайхан хатарнуудые бэлдэжэ, дэлхэйн зондо харуулаабди. Хажуугаарнь хальмаг, буряад, монгол арадуудай наада заатагүй гүйсэдхэдэг hэмди. Би өөрөө түрэл арадайнгаа хатарнуудта дуратай бэлэйб, илангаяа бөө хүнэй хатарта, — гээд нэгэтэ «Байгал» ансамблиин ветеран хөөрэhэн байна. — Холо ойрын гастрольнуудта ябахадаа, ансамблиин захирал, РСФСР-эй габьяата артист Баир Егоровой, суута балетмейстер, элдэб гое хатарнуудые зохёон табигша Татьяна Гергесовагай хүтэлбэри доро хүдэлөөбди. Түрүү хатаршад С.Аюшеев. Л.Бабалаев, М. Базаргуруев, О. Будаев, К.Халбаев, Э. Матоваров, О. Сультимов болон бусадтай суг хамта эбтэй эетэй ажаллабди.

1994 ондо наhанайнгаа амаралтада гарабашье, Виктор Цыденович хатарай кружогуудые эмхидхээ, ветерануудай бүлгэмдэ эдэбхитэйгээр хүдэлжэ, дуу наадаяа орхёогуй, дуратай ажалаа үргэлжэлүүлээ.
Виктор Цыденович Дылыков 1986 ондо Буряадай соел урлалай hалбарида горитой хубитаяа оруулhанайнгаа түлөө «Буряадай АССР-эй габьяата артист» гэhэн үндэр нэрэ зэргэдэ хүртэhэн юм.

2010 ондо наһа бараһан.