БГСХА. Эрдэмэй шэнэ туйлалтанууд

1935 ондо зооветеринарна институт, 1960 ондо Буряадай хүдөөажахын институт байһанаа, 1995 ондо гүрэнэй аттестаци гаража Буряадай гүрэнэй хүдөөажахын академи гэгдээ. 1998 ондо мэдээжэ эрдэмтэн В.Р. Филипповай нэрые зүүбэ. БГСХА 94 жэлэй туршада Зүүн-Сибирь ба Алас Дурнын агрокомплексые ба хүршэ хүбөө можо хизаар, мүн хари гүрэнүүдыешье хүдөөажахын мэргэжэлтэдээр хангана. Оршон сагта академида һуралсалай хэдэн шатанууд бии: бакалавриат, специалитет, магистратура ба аспирантура. Оюутад орохо факультедуудаа шэлэжэ ороһоор, дээдэ һургуулиин эрдэмтэй мэргэжэлтэн боложо гараад, эрдэм мэдэсэеэ улам саашань үргэдхэхэ аргатай.

Сибирь ба Алас Дурна зүгэй аграрна дээдэ һургуули

Буряадай гүрэнэй хүдөөажахын академидэ эрдэм шэнжэлгын ажаябуулга эршэтэй ябуулагдажа, Алас Дурнын хүдөөажахынуудта аша туһатай агротехнологиин шэнэ онол аргануудые нэбтэрүүлхэеэ оролдоно. Энэ ажалынь Буряад республикын ба бүхы Байгалай регионой нютагуудай ажахын һалбаринуудта ехэхэн удха шанартай.
Сибирь ба Алас Дурна зүгэй АПК (агропромышленна комплекс) хүгжөөхэ ажалдаа Буряадай хүдөөажахын академи хэдэн олон можо хизаарнуудай дээдэ һургуулинууд ба эрдэмэй түбүүдтэй нягта холбоотой, хүдөөажахы ба эрдэм мэдэсэ үргэхэ талаар уласхоорондын түсэлнүүдтэ оролсожо байдаг. Газар эдлэлгын эрдэм ухаанай ба шэнэ онол аргануудые бэдэрэлгын (инновацинуудай) хүгжэлтын талаар БГСХА хэдэн олон аграрна вузуудай дунда онсо һуури эзэлдэг. 



БГСХА хаа-хаанаһаа ерэһэн залуушуулые хүндэ ямбатай угтажа, оюутад ба аспирантнуудтаа эрхим шанартай эрдэм мэдэсэ олгожо, гартань дээдэ һургуулитай мэргэжэлтэнэй диплом барюулдаг. Мүн тэдэнэй оюун ухаан, бэлиг талаан, һонирхол һэдэб, бэеын тамир хүгжөөхэ үргэн арга боломжонуудтай: эрдэм-шэнжэлгын лабораторинууд, номой сангууд, дуу хатарай ансамбльнууд, стройотрядууд, тайзан танхимууд, спортзалнууд, секцинууд, һорилгын талмайнууд ба болбосон түхэлтэй һаруул байранууд бултанда дурадхагдана. Эдэ мэтэ асуудалнуудые академиин захирал ба багшанар саг үргэлжэ шиидхэжэ, һайжаруулжа байдаг.

БГСХА-гай захирал: Цыбиков Бэликто Батоевич — ректор; Имескенова Эржэна Гавриловна — һуралсал-хүмүүжэлэй, залуушуулай политикын ба хамаг ажалаа сахим сүлжээндэ оруулалгын (цифровизация) талаар проректор; Алтаева Ольга Алексеевна — эрдэм-шэнжэлгын ба уласхоорондын харилсаанай талаар проректор; Доржиев Сергей Жаргалович — нэмэлтэ һуралсалай (по дополнительному профобразованию) талаар проректор ба таһалгаряагүй һуралсалай (непрерывного образования) институдай директор; Шаргаев Александр Гармаевич — албадан захиралга-ажахын (административно-хозяйственным) талаар проректор.

Буряадай гүрэнэй хүдөөажахын академи 5 факультедууд, 1 институт, 27 кафедрануудтай:


Агрономическа факультед: 1) «Ландшафтный дизайн и экология» 2) «Лесоводство и лесоустройство» 3) «Общее земледелие» 4) «Почвоведение и агрохимия» 5) «Растениеводство, луговодство и плодоовощеводство»

Ветеринарна медицинын: 1) «Анатомия, физиология, фармакология» 2) «ВСЭ, микробиология и патоморфология» 3) «Паразитология, эпизоотология и хирургия» 4) «Терапия, клиническая диагностика, акушерство и биотехнология»

Инженернэ: 1) «Естественнонаучные дисциплины» 2) «Механизация сельскохозяйственных процессов» 3) «Технический сервис в АПК и общеинженерные дисциплины» 4) «Электрофикация и автоматизация СХ»



Технологическэ: 1) «Биология и биологические ресурсы» 2) «Разведение и кормление с/х животных 3) «Технологии производства, переработки и стандартизации с/х продукции» 4) «Частная зоотехния и технология производства продукции животноводства»

Экономическа: 1) «Бухгалтерский учет и аудит» 2) «Иностранные и русские языки» 3) «Информатика и информационные технологии в экономике» 4) «Менеджмент» 5) «Социально-гуманитарные науки, реклама и туризм» 6) «Физвоспитание» 7) «Экономика и организация АПК».

Институт землеустройства, кадастров и мелиорации: «Землеустройство», «Кадастры и право», «Мелиорация и охрана земель».



«Приоритет 2030» түсэлөөр урдалба

2022 онһоо «Приоритет 2030» гэжэ федеральна программада оролсожо шалгарһан дээдэ һургуулинууд гүрэнэй талаһаа эдэй хангамжаар (материально) дэмжэгдэжэ, заатагүй мүнгөөр бэшэ, харин оршон сагай эрилтэдэ харюусамаар һуралсалай хэрэгсэлнүүүд, эрдэм-шэнжэлгын лабораторинууд гэхэ мэтэ базова түхеэрэлгэеэ шэнэлэн һэргээхэ аргатай болоно. 

Тус түсэлдэ хабаадалсаһан Ород гүрэнэй 56 субъектнуудай 132 университедууд Алас Дурнын (ДФО) тойрогой 16 дээдэ һургуулинуудай дундаһаа аграрна шэглэлтэй мэргэжэлтэдые бэлдэдэг ори гансахан вуз манай БГСХА юм. Академи 3 жэлэй туршада тус конкурста түрүүлжэ гарадаг, грантда хүртэхын тулада шэнжэлгын ажалнуудаа ниитэлһэн проектээ хамгаалжа шададаг ба абаһан туһаламжын талаар дээдын яамануудай урда тоосожо шададаг байба. Тус программада эдэбхитэйгээр хабаадахадаа, хүдөөажахыда, олониитэдэ хэрэгтэй тон шэнэ онол аргануудые бэдэрэлгэдэ зорюулагдаһан проектнуудые зохёожо, бэелүүлжэ ябаа. 

Буряадай хүдөөажахын дээдэ һургуули 2022 ондо грантын хэмжээгээр 71 млн 250 мянг түх, 2023 ондо 316 млн түх, 2024 ондо — 288 млн түхэригэй мүнгэ һанда хүртэбэ гээшэ.

Байгша 2025 ондо «Приоритет-2030» түсэлдэ БГСХА гурбадахияа оролсожо, 14 дээдэ һургуулинуудай дундаһаа түрүү һуури эзэлээд, Алас Дурнын вузуудай дунда эрхим вуз гэгдэбэл даа!

БГСХА энэ ехэ амжалтын удаа эрдэм-һуралсалай талаар һураггүй хүгжөөд, эндэ һуралсаха дуратайшуул олошороо. Очноор һураха оюутадай тоо һүүлшын 5 жэлэй туршада 1828 хүнһээ 2618 хүрэбэ. 2024 ондо ороходоо оюутадай тоо Алас Дурнын аграрна вузуудай дундаһаа 40,9 % болобо. 75 % оюутад Агропромышленна комплексын приоритетнэ хүгжэлтын программануудаар һуралсаха.



Приоритедэй мүрысөөндэ оролсоходоо, гүрэн түрынгөө экономическа ба социальна хүгжэлтэдэ өөрын хубита оруулха эрид зорилго табижа, эрдэм ухаанай, шэнжэлгын ба шэнэ онол аргануудые бэдэрэлгэ (инноваци) гэхэ мэтэ 3 шэглэлээр ажал хүдэлмэриеэ ябуулна. Гэхэ зуура, дээдэ һургуулинууд хамтын стратеги баримталан, биоэкономико ба жолоогүй ниидэдэг аппарадуудые (БПЛА) байгуулгын хэрэгтэ анхаралаа хандуулна. 

Түргэн хубилдаг оршон сагта хүдөөажахын академи научно-техническа хүгжэлтын туйлалтануудһаа гээгдэнгүй, шэнэ онол арга бэдэржэ, маркетинг ба эмхидхэлэй арга шадабари, дотоодын ба гадаадын харилсаа холбоо байгуулхаяа оролдоно. Эгээлэй һонирхол татаһан зүйл бэшэ, харин дэлгүүртэ эрилтэтэй, бодото ашагтай арга нүхэсэл оложо нэбтэрүүлхэ уялгатай.

Тиихэдээ гүрэн бүхэнэй валютые өөрынгөө наймаанда тааруулан хаража, тэдэнтэй наймаа гүйлгэхэ арга боломжонууд (ППС — паритет покупательной способности в экономике), дэлгүүрэй макро ба микро (ехэ бага) шатанууд шэнжэлэгдэнэ. Мүн грантын, гүрэнэй мүнгэ һан абаһанай удаа нарин тоосоото баримта бэшэгүүдые согсолон шэнжэлмээр. 

Буряадай хүдөөажахын академиин стратегическа программань — «БайкалБиоФарм 2030. Агробиотехнологи». Энэ шугам баримталһан эрдэм-шэнжэлгэнь эршэтэйгээр ябуулагдахадаа, ерээдүйн сагай олзо оршо хараалагдана. Хүдөөажахын академи ургамал ногоо ургуулха агротехнологиин үргэн дадалаа болзоргүй хэрэглэн, Буряад орондоо ургамалай түхэл янзануудые олошоруулан, 3.0 университет гэгдэжэ, һуралсалай, эрдэм-шэнжэлгын ба шэнэ онол аргануудай түб болохо зорилготой. Экологидо хоро хэнгүй, хүдөөажахын үйлэдбэринүүдтэй эб хамта хүдэлжэ, эмэй ургамалнуудые элбэгээр ургуулха шэнэ шадабари олоод, худалдаа наймаанай шэнэ шатада дабшаха түсэбтэй.

БГСХА 2023 ондо 7 шэнэ лаборатори байгуулһан һаа, 2025 ондо тэдэнээ 12 болгоо, эдэнэй 4-ниинь залуу эрдэмтэд оюутадай. Тэдэнээ шэнэ сагай түхеэрэлгэнүүдээр түгэс хангаад, һуралсалай программануудаа, ехэнхи аудиторинуудаа шэнэлээ. Тиин шэнэ техникэтэй болоһон ушарһаа 77 эрдэм-шэнжэлгын, 15 компьютерна ба 5 естесвенно-научна классуудтай болоһон байна. «Агротех» полигон дээрээ өөһэдынгөө онсо технологи хэрэглэн, эмтэй домтой календула, расторопша, астрагал перепончатый, жимолость, облепиха, сапожниковия растопыренная гэхэ мэтэ ногоо ургуулна. Хүдөөажахын хамтын ба үмсын үйлэдбэринүүдтэй технологи, арга дадалаараа хубаалдажа, ажалай шэнэ шатада гарахадань туһалдаг.

2021 ондо Буряад уласай хүтэлбэрлэгшэ Алексей Цыденов ба Эрхүүгэй губернатор Игорь Кобзевэй үүсхэлээр байгуулагдаһан МНОЦ (межрегиональный научно-образовательный центр мирового уровня) «Байкал» экономикын һалбари ба һуралсалай эмхинүүдые нэгэдхэһэн түб болонхой. Ород Уласай хүдөөажахын яаман БГСХА 5 шэглэлээр ябаха гэжэ тогтоогоо: 1) мяханай мал үсхэбэрилгэ 2) Эмэй ургамал ургуулха 3) жэмэстэ һөөгүүдэй селекци 4) Байгал шадарай байгаалиин ой модоной шанар шэнжэлхэ 5) Байгалай регионой талмай дээрхи экологиин байдалай комплекснэ шэнжэлэл.

БГСХА бодо мал ба хонидто хабаатай асуудалнуудые шиидхэхэдээ, суг хүдэлхэ фермернүүдтэ хандажа, Буряадай хүдөөажахын академи, Буряад уласай засаг түрэ ба Бэсүүрэй аймагай буряад үүлтэрэй хони үдхэхэ ООО «Шэбэртэ», ООО «Победа»; хальмаг үүлтэрэй үхэр үдхэхэ Захааминай СПК «Мыла» гэгшэдтэй 3-тээһээ харюусалгатай хэлсээ баталаа. 



Академиин лабораторинуудта ургамалай микроклональна үрэжэлэй ба малай шуһа мяханай бүридэлэй шанар, ДНК маркер гэхэ мэтэнь наряар шэнжэлэгдэнэ. Хартаабхаһаа эхилээд, Улаан дэбтэртэ ороһон ургамалнуудай үрэһэ пробирка соо хэжэ, тоогүй олон хуулбари (клон) гаргажа боломоор гэхэдэ, энэ нэгэ жэлэй ажал бэшэ, шэнжэлгын апробаци хэдэн жэлэй туршада үргэлжэлдэг. Эндэ үнинһөө техническэ конопля (үлтэнэг, улһан) ургуулжа, шэнэ шэнжэтэй (быстровозобновляемая) целлюлоза бии болгожо, гутал хубсаһа, аргамжа, трос, ниитхэ ба тоһо гэхэ мэтые үйлэдбэрилхэ арга бэдэрэгдэнэ. Коноплягай шахадаһан (жмых) малда тон туһатай тэжээл ха. БГСХА-гай эрдэмтэд республикын ажахынуудай полинуудаар (жэшээнь, К(Ф)Х Шагдаров Т.С.) «Гляна», «Надежда» улһа ургуулдаг дадалтай болонхой. 

Эрдэм-шэнжэлэлгын үрэ дүнгүүд

Мүнөө үень Академиин эрдэмтэд эмэй ургамалай үндэһэн дээрэ хэгдэһэн продукциин патент абахаяа бэлдэнэ: 6 янзын БАД, витаминтай 2 сбор, 11 янзын сай, 4 түхэлэй сироп-бальзам, малай тэжээлэй 2 нэмэлтэ, шүлэнэй борсо, витаминтай кисель, эмэй ургамалай тоһон, гидроладууд мэтэ аша туһатай хоолой зүйлнүүд. 8 продуктын НТД, таарамжын 7 деклараци, 3 БАД-ай СГР абтанхай. Мүн алтан үндэһэнэй (родиола розовая) «Байкалия» шэнэ сорт, сапожниковия ургамалые ургуулха шэнэ арга, Байгалай хизаарай хамаг эмтэй домтой ургамалнуудай цифровой гербарий суглуулагдаад, тэдэнэй аша туһатай шанар шэнжэнь заагдажа, бултанайнь 3 д модель хэгдэнхэй. Эдэ шэнжэлгэнүүдтээ патент, ТУ (технические условия) абажа, ургамал таригшадай, буйлуулагшадай «БайкалФитоФарм» эблэлэй ажал улам һайжаруулан үргэдхэхэ түсэб бии. 2024 ондо Ород Уласай зүгһөө 16 патент абтажа, 15 мэдүүлгэнүүд ФИПС-ын хараада абтанхай. РИД-эй дүнгүүдые ВКР ба НКР хэрэглэн хүдэлнэ.



Агрономическа факультедтэ пестицид ба үтэгжүүлгэ (удобрени) тарааха 4 агродрон абтажа, һаяын сагаар дронуудые (БПЛА) ябуулха мэргэжэлтэдые һургаха саг ерээ.

Технологическа факультедэй лабораторидо эдеэ хоолой үйлэдбэринүүдтэ нэбтэрүүлхын тула эмэй ургамалнуудые шэнжэлжэ, рецептурыень бэлдэжэ, бэелүүлжэ байнхай. Оюутад энэ ажалаар тон һонирхон, хэдэн янзын хоолой жор оложо, календулатай хилээмэ, ганга үбһэтэй хурууд (сыр), мүн элдэб янзын нэмэритэй эдеэ хоол тааруулжа үзэнэд. Урданай заншалта үхэрэй мяханай борсын шүлэ буйлуулжа, СВО руу ябуулна. Тэрэнь тон өөрсэ бүтээмжэтэй: мяхан жэжээр татагдажа онсо аргаар хатаагдаад, нэгэ томо халбага борсо аяга халуун уһанда хэхэдэ, шанга шүлэн боложо, байлдаанай талмайда ябаһан сэрэгшэдтэ тон таарамжатай. Чингисхаанай сэрэгшэд холын замда борсолһон мяханай, хуурай һүнэй үйрмэг (порошкообразная масса) туулмаглаад ябадаг байһан ха юм. Мүн буряад-монголой сагаан эдеэнэй амтан зүйл — ааруул зохидоор найруулагдаа. Саашадаа хүдөөажахын продукци буйлуулха бага хэмжүүрэй үйлэдбэринүүд хараалагданхай: хилээмэнэй мини-пекарня, сыроварня, колбасна цех гэхэ мэтэ. 



Ветеринарна факультедтэ малай тэжээлдэ витаминтай нэмэлтэ болгон эмэй ургамалнуудые буйлуулһан БАД-уудые олоор үйлэдбэрилхэеэ оролдоно. Малай үбшэниие һэргылхэ ба аргалха арга боломжонууд олдожо-бэдэрэгдэжэ байдаг. Һуралсалда хэрэгтэй шэнэ УЗИ-аппарадууд, цифровой сканернууд абтажа, оюутадай шэнжэлхы һэдэбынь гүнзэгырнэ.

Инженернэ факультедтэ һуралсалай техникэ сүм шэнэлэгдээд, оюутад «Вектор» комбайнай, «Беларусь» тракторай нарин хуулбари (точные копии) тренажер-симуляторнууд дээрэ туршалга хээд, һуралсал-дадалай «Агротех» полигон дээрээ жолоодохо шадабарияа мүлихэ аргатай.

Землеустройство, кадастр ба мелиорациин институдта автоматическа онлайн-контролиин приборнууд абтажа, һуралсалай полигон дээрэ хүрьһэнэй шииг шэнжэлэгдэн, ургамалнуудаа уһалхаар гү, бэшэ гү гэжэ элирүүлхэ аргатай болонхой. Мүн ИЗКиМ-дэ виртуальна үзэмжын VR очки бии боложо, оюутад кадастр ба мелиорацида хабаатай асуудалнуудта харюусаха аргатай.

«Оюутадай стартап» мүрысөөнүүд

Иигэжэ факультед бүхэндэ шэнэ онол арганууд нэбтэрүүлэгдэжэ, оюутад мэргэжэлдээ хэрэглэхэ эрдэм мэдэсэеэ үргэдхэжэ, ерээдүйнгээ ажалда ашаглаха бата багажатай болоно гээшэ. «Стартап как диплом» гэһэн федеральна программа академида нэбтэрүүлэгдээд, жэл ерэхэ бүри эрдэм-шэнжэлгэдэ дурлаһан оюутад олошорно. Ямар нэгэ темээр проект бэшээд, «проектын эзэн» гэгдэжэ, ерээдүй сагта олзын хэрэг эрхилэгшын, стратегай шадабари олохо ха юм. «БайкалТех-2023» гэһэн акселерационно түсэлдэ оролсоһон оюутад 2023 ондо «Оюутадай стартап» конкурсын IV ᠋᠋᠋ээлжээндэ грант шүүжэ, бодото байдалда олзын хэрэг эрхилжэ эхилэнхэй. Агроном мэргэжэлтэн болохо Анастасия Максимова эмэй ургамал ашаглаһан «Амтатай аргашан („Сладкий лекарь“)» проектынгаа түлөө 1 млн түхэриг шанда хүртөө. Ерээдүйн ветеринар Ирина Шараповагай «Фитотерапиин түбтэй гэрэй жэжэ амитадай гостинична сервис» гэһэн проектнь мүн лэ 1 млн түхэригээр сэгнэгдээд, һанаашалһанаа бэелүүлхэ арга олоо. Инженернэ факультедэй Луферов Андрей «Эмэй ургамалнуудай сэсэг хуряаха мобильна арганууд» гэһэн проект бэшээд, «Умник» конкурста 500 мянг түх шанда хүртөө. 



2024 ондо үнгэрһэн «Оюутадай стартап» конкурсын V ᠋᠋᠋ээлжээндэ БГСХА-гай оюутад ехэхэн амжалта туйлаба. Тус конкурсда гүрэнэй олон вузуудһаа үгтэһэн 7,7 мянг мэдүүлгэнүүдһээ 2 мянг эрхим проектнууд илган абтаа. Тэдэнэй тоодо ороһон Буряадай дээдэ һургуулинуудай 8 проектнууд илажа гараад, эдэнэй 7-ниинь БГСХА-гай оюутадай проектнууд байгаа: Андрей Сергеевэй нохойн комбикорм буйлуулгын проект; Анастасия Богдановагай «Василиса» аша туһатай зоонааданууд" гэһэн стартап; Альбина Гатаулинагай хүргэһэн сай хэхэ проект; Евгения Цыдыповагай лечебнэ-массажна подушкануудые зохёолго; Татьяна Сотниковагай реабилитациин үедэ хэрэглэхэ «Помогатор» сайт бии болголго; Саран Дашицыреновагай «Ногоон Фил» проект; Светлана Кисовагай «Ойн витаминууд танай гэрэй амитанда» гэһэн проект.



Бүхэроссиин хэмжээндэ эрдэм-шэнжэлгэдэ бэеэ зорюулһан оюутад ба залуу эрдэмтэд урагшатай туһатай һанаашалга, грант бэелүүлбэл элдэб янзын урмашуулгада хүртэхэ байна: нэмэлтэтэй (повышенные)стипенди, академическа, региональна ба президентскэ стипендинуудта хүртэхэ байна.

Дунда һургуулияа дүүргээд, Буряадай гүрэнэй хүдөөажахын академида һуралсаха хүсэлтэй абитуриентнуудта иимэ программанууд хэгдэнхэй: дунда һургуули дүүргэгшэд ЕГЭ-н 3 шалгалтын дүнгөөр 200 балл абанхай байбал, стандартна академическа стипенди дээрэнь нэмэлтэ 10 мянг түх стипенди һара бүри үгтэхэдээ, тэрэ сессинуудтаа «һайн» ба «эрхим» сэгнэлтэ абажа байха ёһотой; мүн һургуулида һайн һурахаһаа гадна: спорт, соёл ба олониитын хэрэгүүд гэхэ мэтэ хэшээлһээ гадуур ажаябуулгануудта эдэбхитэй хабаадалсадаг оюутад именной стипендинуудта хүртэхэ. Онсо габьяа гаргаһан оюутад Ород Уласай юрэнхылэгшын, Ород Уласай засаг зургаанай, Ород Уласай приоритетнэ шэглэлнүүүдээр, Буряад Уласай, ОА «Россельхозбанкын» стипендинуудаар шагнагдаха; жэл бүри «Эрхим оюутан» гэһэн мүрысөөнүүд үнгэржэ, илагшад сэнтэй бэлэгүүд, призуудта хүртэхэһээ гадна һайшаалга урмашуулгын шангууд, хүнгэлэлтэнүүд олон байха юм. ЕГЭ-н дүнгүүдээр 250 баллһаа дэшээ абаһан оюутад БГСХА-гай автошколада түлбэригүй һуралсаха аргатай. 



Оршон сагта Буряадай гүрэнэй хүдөөажахын академи хэдэн хараа бодол урдаа табижа, АПК ба бүхы хүдөөажахынуудай технологи, цифровизаци урагшатай бэелүүлэлсэн, энэ талаар глобальна, регионуудай дундахи, үндэһэтэнэй хүгжэлтын хэрэгые эдэбхи үүсхэлтэйгээр дэмжэхэ уялга даанхай. Академи тус ажалаараа индустриальна партнернуудтаяа, эрдэм-һуралсалай эмхинүүдтэй суг уласхоорондын удхатай проектнуудые зохёожо, зүбшэлгэндэ табина. Энэ талаар эмэй ургамалаар зунай лагерьнууд, залуу эрдэмтэдэй форумууд, технологическа хэрэг ябуулгые түргэдүүлгэ ба АПК-гай цифровизацида зорюулһан стратегическа сессинууд мэтэ үйлэ хэрэгүүд ябуулагдадаг. Дэлхэйн олон яһатаниие эблүүлһэн ажаябуулгадаа Ород гүрэнэй аграрна, агротехническэ дээдэ һургуулинуудһаа гадна олон хари гүрэнүүдэй: Хитадай, Гонконгын, Монголой, Белоруссиин, Казахстанай, Сербиин, Таджикистанай ба бусад гүрэнүүдэй дээдэ һургуулинуудтай эб хамта хүдэлжэ байнхай.



Баян намтартай, холын түүхэтэй Буряадаймнай гүрэнэй хүдөөажахын академи — газар газарай, үе бүриин оюутадай «Alma Mater» боложо, эрхим бэрхэ мэргэжэлтэд, эрдэмтэдые һурган хүмүүжүүлжэ, эрдэм-шэнжэлгын үндэр шатануудта хүрэжэ, 100-аад жэлэй туршада холо ойгуур суурхажа, Буряад оронойнгоо нэрэ солые дуудуулан байхадань урмашан, омогорхомоор!