Шамбалын сэсэгүүд / Цветы Шамбалы



Буряадай үнэн һэшхэлтэ сэтгүүлшэдэй, үндэр долгито яруунайрагшадай түрүү манлайда Яруунаһаа гарбалтай Цырендулма Цыреновна Дондогойн нэрэ онсо толорон мандажа, сагай ошохо тума саглашагүй удхаяа нэмэжэ байһандал юм. 
Бии байгаа хүсэл зоригоо, эрдэм мэдэсэеэ эршэдүүлэн, нара буляалдаанай тэмсэлдэ шармайн ороһон һүлдэ һүрөө ехэтэй буряад эхэнэр хубиингаал алдар суугай түлөө бэшэ, арад түмэнэйнгөө түлөө ами наһаяа зорюулһан гээшэ.
Гүрэн түрын зүгһөө Ц.Ц. Дондогой үндэр зиндаа нэрэ зэргэнүүдтэ хүртөө. Өөрөө өөртөө, арадтаа гол хайра шагналынь хадаа халуун хүсэлһөө байгуулһан яруу найрагайнь, һүзэг бишэрэлэйнь оршон болоно.
Буряадай арадай поэт Цырендулма Цыреновна Дондогойн мүнхэ дурасхаалда зорюулагдаһан энэ ном хадаа үгүүлһэн үгынь сэнтэйе, хэһэн хэрэгэйнь хэмжээлэшэгүй ехые, уянгата шүлэгүүдэйнь ульһатай эршэтэйе гэршэлнэ.
Хатуу хабтаһатай халуун мүрнүүдтэй энэ ном соо поэдэй удаа дараалан хэблэн гаргаһан номуудһаа шүүбэринүүд шэлэн абтаһан, үе саг болон уран зохёол тухай өөрынь һанамжата статьянууд, зохёохы ажал тухайнь шэнжэлэлтэ бүтээлнүүд үгтөө.
Зон соо золтойгоор бадаран байг лэ элитэ поэдэй алдар нэрэнь, аялгата шүлэгүүдынь, абаралта һүзэг бишэрэлынь. Иигэжэ үнэн зүрхэнһөө хүсөөд, шэнэ номоорнь амаршалаял даа, та бүгэдэнөө, уншагшадаа. ❚

Дондогой, Ц. Шамбалын сэсэгүүд / Цырендулма Дондогой ; [согсолон бүридхэшэд: Ч. Ц. Гуруев, Г. Х. Базаржапова-Дашеева, Т. В. Самбялова ; зохёогшо Е. Балданмаксарова]. — Улаан-Үдэ: Буряад Үнэн, 2013. — 269, [2]