Бэһэлиг нюулга

Олон хүн хабаадажа болохо. Бэһэлигэй олон дуу мэдэхэ дууша хүнүүд хабаададаг. Наадагшад хоёр можо боложо, дууша хүнүүдээ тэгшээр хубаажа гү, али гол нютагаараа илгаран урда урдаһаа хаража һууха. Баруун, зүүн можо гэжэ нэрлэгдэхэ. Баруун можынхидой гарта бэһэлиг нюугдаха. Зүүн можынхид хэнэй гарта бэһэлигэй нюугдаһые тааха. Таагаагүй һаа, бэһэлигэй дуу хамтаараа дуулаха болоно. Юрын дуу дуулажа болохогүй, заабол бэһэлигэй дуу дуулаха ёһотой юм. 

Түрүүшээр “Төөнтэйхэн хүринээрээ”, “Нариихан шаргаараа”, “Номхон бороороо”, “Урда уула” гэхэ мэтын олондо мэдээжэ дуунуудые дуулаха. Гоё дуунуудаа абаһаар дуулахагүй, нөөгөөд байхада зүйтэй. Юуб гэхэдэ, дуулагдаһан дууе алишье можо энэ үдэшын нааданда дабтажа дуулаха эрхэгүй бшуу. Наадан бүхэли үдэшэ үргэлжэлдэг. Гоё дуунууд зэдэлдэг. Һүүлэй һүүлдэ нэгэ можын дуунууд барагдажа, тэдэнэр шүүгдэһэнээ мэдэрхэ. Шүүһэн можо шүүгдэһэн можоёо наадалжа, шог дуу дуулаха, шалааха.