Гэнжэтэй наадан

Одоол энэ нааданда 300-400 шагай хэрэгтэй. Гэрэй таһалгын тэгэндэ хибэс гү, али хатуу шэрдэг дэбдижэ, дээрэнь тэдэ шагайгаа адхажа обоолнобди. 

Долоо, найман, арбаншье үхибүүд тойроод һууна. Мүнгэн гү, али түмэр жэжэхэн гэнжэ-ооһор эндэ хэрэгтэй. 

Наранай гараха зүгтэ һуугша наада эхилнэ. Гэнжэеэ дээшэнь хаяжа, обоо шагайһаа нэгэ адхые бэе тээшээ татаха зуураа, дээрэһээ бууһан гэнжэеэ унагаангүй үрдин тодожо абаха хэрэгтэй. Гэнжэеэ унагаагаа һаа, адха шагайгаа обоодонь һөөргэнь бусаахаш. Унагаангүй тодожо абабал, гэнжэеэ дахин дээшэнь хаяжа, татаһан шагайгаа адха соогоо абаад, бажууһан зандаа альгаяа өөдэнь харуулхаш. Дээрэһээ унаһан гэнжэеэ газарһаа тээ дээрэхэнэ, хиидэ, адха дээрээ тодожо абанабди. Гэнжэеэ унагаагаагүй һаа, шагайгаа өөрынгөө урда суглуулхаш. Унагаагаа һаа, обоодонь дахин бусаахаш. 

Иигээд лэ хүн бүхэн адха адхаар шагай абажа, урдаа суглуулна. Наадан ээлжээгээр нара зүб тойрон ябана. 

Тиигэһээр байтарнай, обоо шагайшье үсөөржэ эхилбэ. Үлэһэн арбаад шагайн адха соошни багтахагүй байгаа һаа, табан хурганайнгаа дунда багсалха болонош — тэрэ зүбшөөгдэнэ. Зүгөөр нэгэшье шагай шэрдэг гү, али хибэс дээрэ үлэхэ, унаха ёһогүй. 

Эгээл олон шагайтай болоһон хүн энэ нааданда шүүһэн, илаһан тоотой болоно.