Борисов Владимир

Сэлэнгын аймагай Жаргаланта нютагта 1949 оной февралиин 13-да түрэһэн. Буряадай хореографическа училищи 1968 ондо эрхимээр түгэсхэжэ, дуу хатарай «Байгал» ансамбльда хүдэлхэеэ уригдаhан байна. Уран нугархайгаар, хүнгэхэнөөр матарлан хатардаг зүжэгшэн хатарша мэргэжэлээрээ гансата шалгараа. Тиин саашадаа хори гаран жэлэй туршада ансамблиин гол хатаршан Владимир Борисов гүрэн түрынгөө, республикынгаа тайзан дээрэ бэлиг шадабарияа харуулжа, харагшадай үндэр сэгнэлтэдэ хүртэhэн. Олониитын ажаябуулгада эдэбхи үүсхэлтэй зүжэгшэн хамта хүдэлдэг нүхэдэйнгөө дунда хүндэтэй, залуушуулдаа жэшээ байгаа. 1986 ондо хореографическа искусствын хүгжэлтэдэ амжалтатай хүдэлhэнэйгөө түлөө СССР-эй Верховно Соведэй Президиумай захиралтаар «Ажалай шэн габьяагай түлөө» гэhэн медаляар шагнагдаа. 1987 ондо Владимир Батуевич Борисов Буряадай АССР-эй габьяата зүжэгшэн гэhэн нэрэ зэргэдэ хүртөө. Владимир Батуевич Борисов «Байгал» театрайнгаа ветерануудай ансамбльда орожо мүнөөшье хатардаг, харагшадаа баясуулдаг зандаа.